يوم الحنه اجينا اني وخالتي اخذناها

جانت ساكته كلمة ما نطقت شكلها تعبان سودة عليه

ودينها للصالون وخالتي نزلت تشوف الحجز وتخليني استفرد بيها

.... نوراني نياتي شلونج

تباوع على أظافرها وما ترد

..... ماما بس لا مسويتلج شي

..... مو وياج

شامرتها على صامت

اجتي خالتي واخذتها وكالت بالثنتين تعال

رحت اني للحمام البخاري وحلاق وترتيبات لبست قاطي وجماعتي الي جانو وياي يداومون بالنفط والي وياي بالفوج

همة حسسوني اكو صدك عرس ركص وكولات وحتى هلهلو

جابو سيارة كلها ورد وكاتبين بالتشاش ثلجي الف مبروك عرس ولهان

رحت اخذت نوران وخالتي من صالون جانت بدلتها لونها حلو وغريب مثل ما كالت خالتي احمر نبيذي و هي بيضه شطالع عليها كمر

بس خالتي جانت مثل ضايجه اشرتلها شكو اجتي شوارتني

..... هاي امها الحقيرة شمسوية بيها

.... شمسوية

..... اثار ضرب بالحزام بظهرها ومجويتها بسجينه

حسيت حرارة صعدت براسي ليش شمسويها شنو ذنبها ليش تتعاقب إذا اكو واحد يتعاقب فهو اني اي اني ابو المشاكل

تنفسي صار ثكل أحسه ثكيل عليه وإني اباوعلها 

بوكتها كلت الخالتي تجيب بدلة العرس ونسويها عرس لان ما اخليها بعد هناك لو تموت

كل شوية الوم نفسي شلون تنضرب هاي نوراني ربيتها على ايدي نياتي ما خليت أحد يضربها ولا مديت ايدي عليها كلبي مينطيني

شلون تجي بكل بساطه تجويها وتضربها بالحزام

بالكوة وصلنه للقاعه قاعة النسوان فوك ورجال جوى

...... خاله احلام شوية وبدليها خل تلبس بدلة بيضه ونفض

..... خاله شلون هلحجي لا تتصرف بكيفك ميصير غير بأجر العرس

.... ليش ما اتصرف بكيفي منو الي يلزمني بله عمامي العارات الي عافوني وراحو للنجف وما قبلو يجون العرس لو ابوها الطلي اليمشي ورى كلام مرته

.... زين شوية وتعال حني اديها ونوب ابدللها

.... متحب الحنه لا تعبين نفسج

عفتها ونزلت لقاعة رجال ماكو عمامي بس كم واحد كرايب وأصدقاء

ونوران حتى خالاتها ما اجني فا خالتي احلام عزمت صديقاتها وخالاتي وكرايبها

شوية وصعدت احنيها ما قبلت شكد حاولو صديقاتها وخالتي يقنعوها بالحنه بس قفلت

اعرفها من تقفل عفتها براحتها ما ردت اضغط عليها

اباوعلها صح مطنكرة بس حلوة عكدت حواجبها ومبوزة تخبل طالعه

وفستانها مطلع أكتافها وزنودها الي يلالن من بياض

كلها انصدمت لان طبكت العرس وحنه سوة اكو لامو واكو كالو زين سويت هسة موديل صار هشكل اثنيهن سوة

لبست بدلتها البيضه ولبسوها البركع وسوينا زفة للفندق

وصلنه للفندق بس خالتي ويانه طلعتلها ملابس وعلكتهن وكعدتها على سرير بعد ما فرشت بدلتها لان حيل مدنفشه

انطتني عصارة اسميها ام الكهوة لان ريحتها كهوة محروكه هاي مال اثار حرك

وسلمت علينه وراحت

احاجيها حبيبتي نياتي شكد حاولت افتح موضوع وياها عبالك اسولف ويا حايط

فتحت قيطان البدلة من ورى وهي تريد تكوم متقبل  حضنتها من خصرها بيد وحده كبل صاحت بألم مكتوم

كبل فتحت ظهر البدلة وشفت نياتي شمتحمله ما اعرف شسوي كلبي انمرد عليها

ظهرها بي اثار حرك حتى بالشوكه وضرب بالصونده وحزام

لازمها بيدي وهي تريد تسد البدلة

بقيت اتلمس جروحها وكلبي ما اعرف شبي انضربت هواي مثل هلضربات من جنت صغير وما تحملتهن اصرخ من الوجع

شلون وهاي نوران  ترفه ومتحمله باوعت على عيونها مملؤة دمع وتباوعلي نظرة مثل تشكيلي من امها هاي نظرات افهمها من صغرها

نزعتها البدلة رغم رفضها وتجر بيها بس جاي تأذي ظهرها القماش

غطيته حتى لا تخجل أكثر واباوع على ظهرها ما اعرف شيصير. بيه

بستها من ظهرها و بقيت اتلمس جروح بهدوء

وخليت من عصارة مال اثار

وهاي هادئة بس نفسها  اسمع

....  نياتي حاجيني ماما شلون انطاها كلبها تضربج ليش ما خابرتيني وعمو ليش ساكت

شهكت وكامت تنزل دموعها

جريتها بحضني وهي هدئت فجأة

.... خل يولون اني هنا محد بعد يسويها نياتي بس حاجيني حتى لو حرف ليش ساكته

جان جو تقريباً نهاية شتاء بس هوة عالي حيل بهل ليلة وصوت طكطكه مزعج والهوى قوي بحيث صوته مثل سيارة جارجر جاي تفحط

بقيت امسد على شعرها لحد ما غلبها نعاس ونامت

كمت افتح بتسريحة شعرها كومه ماشات مخلين فتحته الها وخرت بروستيج ورجع شعرها القصير الي أحسها طفولية أكثر بي

مكياجها صاير فلم لان بجت كلشي خرب بس حتى بهاي الحاله عندي حلوة

مسحت مكياجها ولبستها دشداشه مالتي لان خفيفه متأذيها وما جايبه ملابس خفيفه الها

جانت رغم نايمه بس مثل تحس لازمه الغطه متخليني اوخرة بالكوة بدلتلها

علكت بدلتها وعزلت الغرفه لان ما احب انام والمكان النايم بي هوسة

عطرها الشاليزي مميز بحيث طغه على عطري

من زمان اتذكر من جانت صغيرة إذا جابتلي كلاص مي يصير بي عطر منها

ليل كله بقيت صافن بوجها مكدرت انام

اساسً اني يا يوم نمت اصدقائي وكرايبنا يسموني وحش ليل

ما اعرف شوكت انام وليش اكعد من صبح

ما اجاني نوم كعدت وطلعت من موبايلي زيارة عاشوراء لان مجايب كتاب

ازور بالنيابه عني وعن والدي ووالد والدي واعمامي واخوالي وكل من مات على ولاية علي عليه السلام ومن اسلم وأمن بلله ومات على سلمه

وعلى أولياء الله الصالحين وبالنيابه عن شيخ علامه هشام الحداد وعن شيخ علامه علي القاضي وسيد عبد الزهرة الكرعاوي وووو  ....................

الى ما لا نهاية وأيدي بزيارة عاشوراء احب الكل تأخذ ثواب مو بس اني

لحد ما غفيت على سجاده

صبح كعدت لكيتها كاعده وصافنه اشاقه وياها احاجيها اضحكها ابد ماكو

بس كامت غسلت وجها واسنانها وبدلت

اني هم على الواهس ما اشتهيت اكل بدونها وبدلت

طلعت لابسه لبسها المعتاد بنطرون وقميص وسترة

باوعت عليها من جهة ما اريد اضغط عليها ومن جهة هواي أنصحها لا تلبس هيج بس تعاند ومتقبل ودكلي منو أنته وتدخل ابويه قابل محد اله شي عندي

هسة اني مسؤول عنها تنهدت  عفتها براحتها

نزلت دفعت حساب الفندق وشغلت سيارة

لحد ما وصلنه لبيت اهلي دخلت سيارة للكراج نزلت وهي نزلت وراي ضايعه

لزمت أيدها اريد احسسها بالامان بس خبلتني نظرتها الي تبين خوفها

دخلت من باب الاستقبال جانو اهلي هستوهم راجعين من نجف بحيث اخواني مطشرين ونايمين بالكاع بدون فراش من تعب

وامي تعزل بالغراض

شافتنه واجت تهد هي من زمان متحب نوران وامها بس جنت اني أقنعها سعادتي متكون اله ويا نوران بس من انخطبت بعد حتى ما تنطيني وجه

..... جبتها واجيت يولهان تكسر كلمتي ودخل لبيتي هلبر**** لك مو هيجي ربيتك والله لج الكح*** ام السحورة شسويتي بحالنه الله لا يوفقج كون عسها بحضج وبختج

وتقربت منها تريد تضربها بسرعه خليتها وراي وامي تخبلت تغلط عليه وعليها

اخواني كعدو وابوية عاط بأمي وسكتها

جان رايح يجيب صينيه كيمر عرب لان عرف بينه راح نجي صح ما قابل عليه وما يشوفني بس جان حيل يحب نوران حتى أكثر من خواتي

سلم عليها وهي بس دموعها نازلة ما حجت حرف

..... بوية روح صعدها لغرفتكم بين ما تهدأ الأمور

.... صار يابه

بست رأسه وهو دار وجها مني  اخذتها وصعدنه لغرفتنه

هي كعدت على سرير وخلت رأسها على مخده وكامت تبجي أكثر

نزعت سترتي ورحت اخذها الحضني ما تقبلتني نفرتني وراحت بعيد عني

كامت تعيط وتبجي

.... عوفني ما اريد احد اطلع برة عوفوني بحالي شتردون مني

طلعت بين ما تهدأ احتاريت انزل جوة اهلي نبذوني ادخل خاف هاي يصير بيها شي

اخر شي سويته رحت لطيوري طابق ثالث

مسويلهن محميه ومبرده خاصه الهن هملتهن صار فترة لان انشغلت

طلعتهن واطيرهن   احب حماماتي احسهن يمشن بدمي

رغم كبرت عليهن بس اعزهن ونوران تحب الحيوانات عفتهن الها

جانت اكو طفل حمامه هستوة فقس

اتذكرت نوران من جانت تجي هي تخاف من حمامات قبل بس طفل مالتها متخاف منه أخذت واحد من مالاتي وعود تشوفه إليه من فوك لان جنت جوه وما تدري وكعت طفل

ومات

كامت تبجي عليه

ههههه كل ما اتذكر بجيها وشكلها اموت ضحك

شوية ونزلت لكيتها مبدلة وصافنه جانت لابسه تراك  وتكنكنك بموبايلها

فتحت ثلاجه شربت مي واراقب وضعها

ما حست بوجودي مدري حست وغلست

جانت متمده على سرير بنفس نومتها المعتادته تحضن نفسها بحيث تصير هلكدوتها  هي مو رشيقه أو بالاحراء ضعيفه حيل جنت حتى اخاف الزم أيدها لا تنكطع لان حتى شرايين بارزه

عدها خصر شكد متلبس ملابس ضيكه يطلع  هدل وعريض على خصرها

وعضمة ترقوة بركبتها بارزه

جان جسمها مثل عارضات الازياء بالضبط

صح ضعيفه بس وجهة جان مدبدب مدري شلون ونوب خديداتها ونونه حنجها

تخليني اكزكز عليها

طلعت موبايلي إلهي نفسي بي وجان عندي دروس فايته لان ادرس فقه

جان درس يحجي على سجون ذكرني بفترة سجني بسوريا

جنت هستوني متخرج من ثالث متوسط وانسجنه بسوريا لان ما عدنه جناسي

واعتبرنه سجناء سياسيين

شلون أيام حلوة

رغم عمري صغير بس ما مبين عليه يكول عمري ٣٠ هيج لان ضخامتي وشواربي

ولأن بدون جنسيه ما عرفو عمري 

قطعت تفكيري نوران

وكعت من سرير وتكربست

جنت رغم ما منتبه بس حركاتها وفهاوتها اعرفها

من تلزم موبايل تنعمي بعد

وهي من صغيرة الله يسلمها حركة اعرفها ما تكعد بدون متسوي مصيبه

انضربت شفتها بحافت سرير  وكامت تنزف دم بغزارة

........ يتبع

متابعه شيقه 😇😇