المهم مرت الأيام و أنا و خالتي ما بنتكلم مع بعض خالص و أستاذ حذيفه دا من اليوم القال لي أنا ما زول حب و كويس إنو دا كان مقلب بقيت أختصرو و أحاول أبعد نفسي منو ، بقى لمن يتصل علي مرات أرد و مرات لا و لمن أرد بقول ليهو كويسين الحمدلله و بألف لي عذر من عندي عشان أقفل ، المهم الحاجه اللاحظت ليها إنو خالتي بقت تطلع كل مره من غير ما تكلمني نظام لسه زعلانه مني ، مع إنو المدارس قافله! يبقى بتمشي وين هي؟
يوم وقفت قدامها و سألتها ، من غير ما تعاين لي قالت لي بمشي المدرسه! .....قلت ليها بس المدارس قافله! مش أجزتوا؟
قالت لي شغالين مراجعات لـ تالته ثانوي ، بعد كلامها دا صدقتها و ما جادلتها تاني ، في نفس اليوم دا قصي و نادر  رسلوا في القروب و قالوا النتيجه طلعت و إنهم ناجحين في كل المواد ، قصي كان معدلو 3 و نادر 3.50 ، فرحت ليهم شديد و في نفس اللحظه خفت من نتيجتي ، سألوني اذا شفت نتيجتي ولا لا ، قلت ليهم لا ما شفتها ، نادر قال لي ليه ؟.....قلت ليهم حالياً خايفه و متوتره بس لو شفتها حـ أوريكم ، المهم بعد نص ساعه كدا إتصل علي أستاذ حذيفه ، عرفتو عايز يسألني عن النتيجه ، أول ما فتحت الخط قال لي أها بشري!
قلت ليهو لسه ما شفتها ، قال لي ليه منتظره شنو؟
قلت ليهو ما عايزا أشوفها هسي ، قال لي خايفاها تطلع كعبه؟
قلت ليهو دي حاجه أكيده ، قال لي الغريبه إنك كنتِ بتطلعي مبسوطه من الإمتحان و بتقولي ساهل! قلت ليهو ما عارفه غيتو انا العارفاهو اشتغلت في الورقه ، بعد مسافه ضحك و قال لي ألف مبرووووك ، شفت نتيجتك ناجحه في كل المواد و معدلك 3.70 ، لمن قال لي كدا نططت عيوني و من دون ما أحس قفلت الخط ، بقيت أحاول استوعب في الكلام السمعتو! أنا ناجحه؟ و معدلي 3.70 ؟
رجعت ليهو تاني و قلت ليهو عاين ما تكذب علي ما عايزا معاك أي نوع من أنواع الهظار ، قال لي أقسم بالله ما بكذب عليك ، حتى خالتك عارفه لأني كلمتها قبل شويه ، سكته مسافه عشان أستوعب الكلام ، قلت ليهو دقيقه ، قفلت الخط و طوالي دخلت قروب الدفعه ، و منو دخلت رابط النتيجه ، دخلت رقمي الجامعي و ظهرت لي النتيجه ، إسمي دا قريتو مرتين حتى اتأكدت ، ختيت يدي على خشمي و عيوني كانت بتلمع من الفرح ، أول مره أجرب إحساس النجاح ، جريت جري لخالتي من غير ما اتكلم معاها حضنتها طوالي و قلت ليها واي يا خالتي ما مصدقه إنو دي نتيجتي ، ضمتني عليها و قالت لي مبروك شديد ليك يا بتي ، ما خذلتيني و فرحتيني شديد والله ، قلت ليها طيب ليها ما جيتيني لمن عرفتي نتيجتي من أستاذ حذيفه؟
قالت لي كنت منتظراك تجي تبشريني ، قلت ليها واي بس للحظه دي ما قادره أصدق ، قالت لي قولي الحمدلله يا بتي و ربنا يوفقك و يسدد خطاك....بالمناسبه دي حـ أمشي البقاله الجنبنا دي و اجيب ليك الحاجات البتحبيها، عشان كدا أطلبي العايزاهو ، ضميتها زياده و قلت ليها آسفه يا خالتي على الكلام الـ.......قاطعتني و قالت أنسي الحصل و خلينا نفتح صفحه جديده ، المهم بعد ما خالتي طلعت جريت لتلفوني و إتصلت على أستاذ حذيفه ، طوالي رد علي ، بقيت اصرخ و اقول ليهو وااااي واي ما مصدقه أصلو ما بصدق! ....بقى يضحك و يقول لي لا صدقي لأنو دا نتيجة تعبك و جهدك ، مش قلت ليك لكل مجتهدٍ نصيب؟ و انتي دا النصيب الأخدتيهو من إجتهادك ، عايزك يا مها من اليوم تجددي عزيمتك و إصرارك ، ما عايزك تتخاذلي و تتشائمي ، ماف تعب بضيع ساي ، خليك واثقه من نفسك و قدراتك ، أبداً ما تستسلمي عشان نفسك و خالتك و و و و
المهم اتكلم معاي كلام كتير زاد من فرحتي ، إتمنيت المكالمه دي ما تخلص خالص ، في الختام قال لي ما عايز أخرب ليك فرحتك دي بس حابي أذكرك انو الملاحق بعد أسبوع ، ما تضايقي و ما تشيلي هم ، بس حـ تنضفي المواد الرسبتي فيها في السمستر الأول ، بس من اليوم دا تاني ما عايز اسمع انك رسبتي في ماده ، حاضر؟
قلت ليهو حاضر.....سكت و قبل ما يقفل قال لي و تاني ما تختصريني و أول ما اتصل عليك ردي علي و لو زعلتك في حاجه قولي لي عادي بس ما تتغيري كدا من غير سبب و تختصريني ، قلت ليهو طيب و كنت قايلاهو خلاص حيقفل بس قال لي بالمناسبه ليه فجأه كدا اتغيرتي و بقيتي ما بتردي علي طوالي و بتختصريني لو رديتي؟
قلت ليهو مزاج مني ساي ، قال لي والله؟
قلت ليهو آيي ، قال لي خلاص يا زوله حـ اقفل بعد دا بس خليك حريصه على الكلام القلتو ليك و أعملي بيهو و أنا حـ أكون معاك دايماً ، خطوه بخطوه 💜
بعد ما قفل بقيت حاضنه التلفون و ببتسم ساي لحد ما خالتي جات داخله و هي شايله معاها كبايتين عصير و حلويات و شيبس ، قلت ليها جيتي متين؟
قالت لي من قبيل ما سمعتي صوت الباب؟ قلت ليها لا ما سمعتو ، المهم قعدنا سوا و بقينا نتكلم مع بعض و نضحك و نسينا اننا كنا متزاعلين ، انا ولا شي،من غير خالتي و هي كذلك ....
المهم يوم من الأيام بعد ما مشيت إمتحنت آخر إمتحان بالنسبه للملاحق جيت البيت الساعه 3 ، لقيت خالتي طالعه ، لمن شافتني إتخلعت ، قلت ليها ماشه المدرسه زي الزمن دا ولا وين؟
بتردد قالت لي أي ماشه المدرسه ، زي ما عارفه شغالين معسكرات مع ناس تالته في الأوقات دي ، طبعاً عشان ماف شي يخليني أشك في كلامها صدقتها ....قلت ليها طيب مع السلامه و دخلت جوه ، أول ما دخلت الغرفه لقيت تلفون خالتي ، قلت خالتي نست تلفونها و طوالي شلتو و طلعت الشارع و في أول لفه من بيتنا شفتها من بعيد ركبت في عربيه و لمن ركزت مع السواق لقيتو أستاذ حذيفه ، قلت يمكن إتلاقوا صدفه و أستاذ حذيفه أصر إنو يوصلها ، على بال ما أمشي عليهم هم إتحركوا و مشوا ، رجعت البيت و مشيت المطبخ عشان أجهز لي أكل بس قبل ما اعمل حاجه قلت اخخ منك يا مها، كان ممكن اتصل على حذيفه من تلفوني أو تلفون خالتي عشان اقول ليهو رجع خالتي دي لأنها نست تلفونها ، طلعت من المطبخ بسرعه و كنت حـ أدخل الغرفه بس فجأه كدا خالتي جات داخله ، قلت ليها نسيتي تلفونك ، قالت لي آيي بعد ما وصلت فرن خليل و كنت خلاص حـ اركب المواصلات اتذكرت إني نسيت تلفوني ...
أنا هنا استغربت! أنا بعيني شفتها راكبه مع أستاذ حذيفه! فشنو البخليها تكذب علي؟ يعني شنو لو قالت لي انها لقت حذيفه و ركبت معاهو؟
ما سألتها عن حاجه بس الموضوع ما طلع من بالي ، بعد ما شالت تلفونها و مشت ، قلت حـ اتصل على أستاذ حذيفه و أسألو بس ما هسي لأنو خالتي حتكون معاهو و هسي هو أكيد منتظرها برا بـ عربيتو تشيل ، مشيت مع خالتي لحد الباب و عملت نفسها بونس فيها و شغاله ليها ما تطولي و و و ، و في الحقيقه أنا عايزا أشوف أستاذ حذيفه! بس عربيتو ما كانت واقفه قدام بابنا!
بعد ما خالتي طلعت عاينت يمين شمال بس ما شفت عربيتو ، جريت للحيطه التانيه ، كان في حجر كبير كدا قربتو و ركبت فيهو و بقيت أعاين في الشارع ، شفت خالتي ماشه بس عكس مكان المواصلات ، راقبتها لحد ما وصلت عربية حذيفه الكان واقف بيها بعيد! استغربت ديل مالهم و ليه حذيفه واقف بعربيتو بعيد كدا كأنو ما عايز زول يشوفو؟
بعد المغرب لمن خالتي جات قعدت اتونس معاها عشان تجيب لي سيرة حذيفه بس هي بالغلط ما ذكرت إسمو مع اننا بنحكي أبرز تفاصيل يومنا لبعض، هي كانت لو في زول وصلها بتقول لي ، مره كان في شاب كدا ولد الراجل المأجرين منو البيت لقاها جايه من المدرسه فقام أصر إنو يوصلها و جابها معاهو و هي 3 أيام بتشكر فيهو! طيب دا نفس الموقف داك فـ ليه ما جابت سيرة حذيفه!؟ يعني كأنها قاصده ما تقول لي إنو هو وصلها!؟
في نفس اليوم دا بـ ليل ، رسلت لـ حذيفه في الواتس ، بعد نص ساعه فتح رسالتي و رد لي بـ : مها المنفسنه الليله جاتك من وين رسلتي لي و بتسألي عني؟ 😂
قلت ليهو غلطانه أنا خلاص خلاص حـ ابطل ارسل ليك تاني و دي آخر رساله ، قال لي الزول خالص ما يهظر معاك ، المهم بقيت آخد و أدي معاهو في الكلام و افتح ليهو في المواضيع و أنا هدفي من دا كلو اصل لنقطه معينه ، عايزاهو بأي طريقه يقول لي أنا قبيل جيت حيكم و وصلت خالتك معاي بس هو التقول موصنوا نهاي ما جاب لي سيره ، فـ طوالي قلت ليهو : اتخيل يا أستاذ حذيفه خالتي بقت تنسى كتير 😂 قبيل طلعت و نست تلفونها بس جات راجعه ليهو تاني ، كنت خاته في بالي إنو لو اتلخم و نسى انو قبيل وصل خالتي فـ هسي بعد كلامي دا حـ يتذكر و يقول لي ، بس ما قال لي حاجه غير : عادي بعد مرات الإنسان بتلخم و بنسى حاجات مهمه.....
أنا هنا بالجد اتأكدت إنو في شي داسنوا مني أستاذ حذيفه و خالتي و ما بنكر إني للحظات فكرت فيهم غلط! طردت الأفكار السيئه دي من بالي و قلت أخجلي من نفسك يا مها، دي خالتك فـ كيف بتشكي فيها مع واحد أصغر منها! و بعدين خالتي مستحيل تعمل كدا و ما بتمشي شمال ، بعد يومين من الكلام دا خالتي طلعت ، كنت براي في البيت و خالتي ذاتا ما عملت الغدا طلعت بدري ، فقلت احسن أمشي اشتري لي إندومي ، شلت قروشي و لبست لي عبايه ، لمن وصلت الدكان ، جاني صوت بت وراي و هي بتقول لي مها كيفك؟
لمن عاينت ليها اتذكرتها بس إسمها راح لي ، سلمت عليها و قلت ليها كويسه ، اشتريت الإندومي حقتي و أول ما إتحركت إتلفت ورا و قلت ليها انتِ ما مشيتي المدرسه اليوم ولا شنو؟
قالت لي مشيت و جيت راجعه ، قلت ليها معناها ما قاعده تحضري المعسكر العاملنوا ليكم!
قالت لي معسكر شنو؟ ما عاملين لينا أي معسكر ، قلت ليهو بإستغراب ما عاملين ليكم معسكر؟
قالت لي لا ما عاملين ، قبل فتره كانوا عايزين يعملوا لينا و كلمونا بس الطلاب قالوا القروش كتيره عشان كدا إتلغى ، قلت ليها اهاااا ....
بعد ما طلعت من الدكان ، راسي بقى يودي و يجيب ، خالتي كانت بتكذب علي! طيب كانت بتمشي وين اذا ما كانت بتمشي المدرسه؟
طبعاً البت الهسي دي بتقرا في المدرسه البتدرس فيها خالتي و زمان خالتي كانت بتديها دروس خصوصيه في بيتهم ، ديل ساكنين في الشقه الواقعه شمالنا ، المهم رجعت البيت و انا راسي لافي و الإندومي دي ذاتها مسخت لي ، أكلتها و انا ما جايني طعم ، المساء لمن خالتي جات قعدت أعاين ليها ساي و أنا الكلام في طرف لساني بس ما عارفه أبدا ليها من وين و اسألها اقول ليها شنو!؟
خليتها ما سألتها بس شفتها دخلت حاجه في دولابها و قفلتو بالمفتاح على غير عادتها ، ما عارفه ليه الفتره دي بقت تقفلو بالمفتاح ، الفضول ما خلاني و قلت إلا أشوف دا شنو الفي الدولاب دا! احتمال ليهو علاقه بالمكان البتمشي ليهو خالتي!!
المهم أسبوع كامل ما قدرت اصل للشي الفي دولاب خالتي ، ما عرفتها بتدس المفتاح وين ، في يوم قعدت أراقبها بالدس لحدي ما شفتها دفنتو جنب رجل السرير ، لمن طلعت في اليوم البعديهو أنا طوالي جريت للمفتاح و فتحت دولابها و قعدت أقلب فيهو لحدي ما لقيت أوراق كتيره ، الكلام الكان مكتبو فيها كلو بالإنجليزي ، ختيت الورق على السرير و جريت جبت تلفوني ، صورت الأوراق كلها و رجعتهم مكانهم و رتبت دولاب خالتي و قفلتو و رجعت المفتاح لمكانو ، مشيت قعدت في المظله و مسكت تلفوني عشان أدخل الصور ديل في قوقل و افهم الكلام المكتوب شنو بالعربي ، بس إكتشفت إنو ما معاي رصيد ، شلت لي قروش و مشيت للإتصالات الجنبنا ، بتاع الإتصالات كان بتكلم بالتلفون و أنا واقفه ليهو و هو الحيوان كأنو ما شايفني منتظراهو! مفروض يمشيني بعديها يكمل ونستو بالتلفون! لمن خلص قال لي معليش على التأخير ، قلت ليهو المهم هاك عايزا رصيد زين ، شال مني القروش و قال لي مليني الرقم ، بعد ما مليتو ليهو النزل نزل في تلفوني الكنت شايلاهو معاي ، لمن كنت حـ أطلع قال لي والله ما شاء الله طلع عندكم معارف بـ عرباتهم كمان!
إتلفت عليهو و أنا ما فاهمه حاجه! قلت ليهو معارف شنو؟
قال لي عاد أنا ما بشوف يعني!؟ سيد العربيه الكل يوم بوصل خالتك دا ما من معارفكم؟ ولا قريبكم؟......سكته ما إتكلمت معاهو ، قال لي لا لا ما تفهميني غلط ما قصدي اتحشر بس عشان انتوا ساكنين هنا من زمان و ما حصل شفنا ليكم زول من أهلكم ، يعني كأنكم جيتوا على الدنيا دي اتنين و بس ، بت و خالتها!
طبعاً كلامو وجعني شديد ، أصلاً فيصل الحيوان دا جنو يستفز الناس و يتكلم عليهو، الإتصالات الفاتحها دي فاتحها عشان يتشمر بيها و يعرف أخبار الناس! بطلعوا متين و وين و مع منو و بجوا راجعين متين ، لو سألتو عن أي زول بقول ليك شفتو طلع قبيل أو قبل شويه!
قلت ليهو يعني عشان زول وصلت خالتي بغض النظر عن علاقتنا بيهو شنو تقول لي طلع عندكم معارف و بـ عرباتهم؟ البسمعك بقول في قطر طويل من العربات واقف جنب بيتنا!؟
قال لي دي صيغة مبالغه لكن هسي دي في راجل كبير كدا جا بعربيه مظلله و كان بسأل عن بيتكم ، قلت ليهو بالجد؟ دا منو كمان؟ ....قال لي عايز منو هو؟
قال لي : قال عايز بيت بدور عبدالرحمن و انا وصفت ليهو بيتكم و حالياً حيكون هناك ، طلعت منو و أنا مستعجله عشان أعرف دا منو دا البسأل عننا! لمن وصلت البيت ما كان في أي عربيه واقفه قصادو بس كان في أثر لساتك عربيه ، قلت دا منو كمان البعرف خالتي دا؟
المهم دخلت جوه و انا بفكر في كلام فيصل بتاع الإتصالات! منو دا القاعد يوصل خالتي كل مره و هي ليه بقت تدس مني و دا منو دا الجا لحدي البيت و سأل عنها؟
قعدت و بقيت أفكر بس ما طلعت بحاجه ، نشطت و دخلت صور الأوراق في قوقل عشان تترجم ، الشبكه كانت كعبه ، بقيت مره أعاين للصور و مره للشبكه الزفته دي، الحاجتين الوحيدات القدرت أقراهم من الأوراق دي كلها اسم المستشفى الكان مكتوب "مستشفى الذره " و اسم المريضه: بدور عبدالرحمن عثمان خيري ، إنخلعت و نططت عيوني و بقيت افتح و اقفل في الشبكه لحد ما فجأه كدا الصوره إترجمت و بقت بالعربي ، كنت واقفه على حيلي بس أول ما قريت الكلام المكتوب هبطت و قعدت على السرير و عيوني مليانه دموع ، الدنيا دي مسخت لي زياده و خلاص بقيت أشوف طشاش طشاش و قلبي دا حسيت بيهو إتقطع حته حته ، بصعوبه كنت بتنفس ، حيلي مات و القعده ذاتا غلبتني ، رقدت في السرير و انا حاسه راسي بقى تقيل و جسمي دا فجأه كلو بقى سخن و فجأه كدا جاتني رجفه و أنا من السرير ما قدرت أقوم ، بقيت ببكي بس ، انا غير خالتي دي ما عندي زول في الدنيا دي ، أمشي وين البعديها لو حصل ليها حاجه أعيش كيف بدونها أنا؟ بكيت كدا لمن صدعت ، صعب علي استوعب إنو خالتي.......عندها سرطان و كانت داسه مني 💔

تؤلمنا الأيـام ونقول غــداً أجمـل ، ويأتـي الغد وندري أن الأمـس کـان أرحم ..

يتبع......