اسكريبت لطيف ♥️

_مالك يا ريان
اترمى فى حضنى فجأة وهو بيتنهد بتعب واضح وفجأة لقيته ابتدى يدمع وبيعيط فى حضنى
ريان بدموع : حبيبتى القديمة ماتت

لوهلة اتصدمت جوزى جاى يقولى حبيبته القديمة ماتت ولوهلة قلبى وجعنى بيعيط عليها بيحبها لسة طب المفروض اعمل اي دلوقتى !!

بعيدا عن أى حاجة بس دموعه حسيتها بتقطع فى قلبى حضنته وتبت فيه جامد كإنه ابنى اللى خايفة يضيع منى

ريحانة بدموع : طب متعيطش والله هى اكيد فى مكان احسن كتير تعالى ندعيلها انا وانت ربنا يرحمها بس متعيطش

بصلى ببراءة شوية وقالى : هل يتبقى احد بهذه البراءة واللطف مثل ريحانتى يا الله

ابتديت استوعب لما سمعت ضحكته اللى بتعلى تدريجيا وانا دموعى بتنزل على أساس أنه بيعيط اي ده مبيعيطش !!

_ انت بتمثل عليا
ريان بضحكة : بتعيطى على حبيبتى القديمة يا مراتى
_ انا بعيط عشان افتكرتك بتعيط وبعدين حبيبتك اي يلا انت بتخونى يا ريان
_ يا هبلة هو انا بحب حد قدك وبعدين هو انا حبيت غيرك امتى اصلا
_ ما انا مش عارفة بقى هو كل حاجة جت بسرعة مفكرتش فى حاجة أما لقيتك بتعيط بتعيط عليها يا ريان
_ هى مين دى اصلا
_ حبيبتك القديمة اللى هى خيال اصلا دى
مسك راسه كأنه واحدة مصدعة من عيالها : صبرنى يا رب يعنى يا حبيبتى تقولى بلسانك أنها خيال وزعلانة
_ خيال ولا مش خيال مش موضوعنا انت تخيلت أن ليك حبيبة قديمة وماتت من حقى ازعل

لفيت وشى وانا بربع ايدى وببصله باحتقار كده من فوق لتحت واديته ضهرى وهتحرك مسك ايدى بسرعة وفى ثانية لقيتنى فى حضنه مينفعش اعيش في حضنه يا جماعة بجد مش هزار

_ طبعا حبيبة قلبي عارفة انى بهزر صح
_ صح
_ وطبعا حبيبة قلبي عاقلة ومش بتزعل من الهزار صح
_ صح
_ وطبعا حبيبة قلبى
_ ما خلاص يا عمنا هى كوسة هى زريبة يا حبيبى
زقنى بعيد بهزار _ بومة مالهاش فى الرومانسية
بابتسامة سمجة _ حبيب قلبي تسلم
وضحكنا احنا الاتنين على شكلنا

دى حياتنا كأسرة بسيطة مكونة يدوب منى ومنه لسة وبالله ما عايزة حاجة من الدنيا غيره

دخلت المطبخ خلصت شوية حاجات خرجت لقيته قاعد على الاب بتاعه واكيد بيعمل حاجة شغل ويت لحظة كده ده بيبتسم تفتكروا بيخونى !!

_ حبيب قلبي بيضحك فى الاب ليه
قام نط من على الكنبة بفرحة _ اتقبل يا ريحانة اتقبل
بفرحة اكبر _ بجد
حضنى بحماس واد اي حضن الفرحة ده جميل ما قولنا نعيش في حضنه يا جماعة محدش صدق
_ مين اشطر كتكوت حبيبى
_ انا مش مصدق نفسي يا ريحانة خلاص حلمى هيتحقق
بدموع فرحة لفرحته _ ربنا يحققلك كل احلامك يا رب يا حبيبى ودايما تفضل فرحان كده
_ ربنا يديمك فى حياتى يا وش السعد عليا
_ يا جدع بقى هتكسف والله

محدش بيفرحله أدى الميل ده جاله من شركة ألمانية كبيرة
( مش لإبادة الحشرات ههه انى اسف 🙂 )
وهو مستنيه بقاله اكتر من خمس شهور وكان نفسه يحقق الحلم ده ويختاروه هو من بين كل الايميلات اللى عندهم وربنا مخذلوش اي ده ويت تانى هو المفروض يسافر !! هيسيبنى !!!!
عند النقطة دى كشرت فجأة ودمعت
مسك ايدى _ مالك يا ريحانة
_ هو انت المفروض تسافر وتسيبنى
بصلى اكنه افتكر بردو وملامحه اتبدلت وكشر ومش عارف هيقول اي : ما هو اصل
سهلت عليه حيرته : متقلقش دلوقتى خلينا فرحانين بنجاح اشطر كتكوت واما يجى وقتها ربنا هيحلها
بغمزة _ ما تخشى تلبسى وننزلنا شوية كده
_ أيوة بقى يا رب تتقبل كل يوم بميل من شركة شكل
لبسنا بسرعة ونزلنا وقضينا يوم من الطف ايام حياتنا ربنا يديم فرحتنا دى يا رب

عدى تلت شهور كانت أيامنا عادية بس طبعا وهو جمبى ليها طعم تانى معروفة كان بيروح شغله ويرجع يلاقينى عاملة الاكل وناكل ولو هنروح عند مامته عند أهلى أو نقضى ايامنا اللطيفة فى البيت وتشغل كرتون وفشار بقى وحضن حبيبى طبعا ميتنساش اتجوزوا يا جماعه اه والله

لحد ما جه يوم دخل من الشغل ساكت وملامحه حزينه دخل الاوضة على طول وحطيت الاكل ونديتله ومردش عليا دخلت لقيته قاعد على السرير وحاطط رأسه بين ايديه وهمه شكله كبير قلبى وجعنى أما شوفته بالمنظر ده
قعدت قدامه على ركبى كده ورفعت وشه ليا وعنينا اتقابلت عينه فيها كلام كتير اوى وحزن كبير واللى فوق ده فى نظرة مفهمتهاش ودى حاجة غريبة انا دايما بفهمه

_ مالك يا ريان
_ ماليش يا ريحانة لو سمحتى سيبينى لوحدى
_ من امتى بتخبى عنى حاجة احكيلى مالك
بعصبية اول مرة أشوفها _ قولت ابعدى عنى سيبينى لوحدى مبتفهميش

اتصدمت وعينى دمعت اول مرة ريان يزعقلى من ساعة ما اتجوزنا مخوفتش منه اد ما خفت عليه يا ترى مالك بس يا ريان

_ طلع كل عصبيتك فيا يا ريان بس مستحيل اسيبك فى الحالة دى وأخرج انا جنبك
بصلى وعينه ابتدت تدمع _ ارجوكى سيبينى لوحدى دلوقتى وانا شوية وهخرج
روحت وقفت قدامه ومسكت وشه بدقنه القمر دى بين ايديا وبصيت فى عنيه بحنيه وحب _ انا هسيبك وهخرج زى ما عايز بس عايزاك تعرف انى دايما جنبك وانى موجودة عشانك ومستنياك تحكيلى اللى مضايقك عشان احنا متعودناش نخبى حاجة على بعض وعشان الحمل على اتنين اخف ♥️

سيبته وخرجت وقفلت الباب عليه وعيطت عيطت كتير اوى مش زعلانه منه لا زعلانة عشان شايفاه ضعيف وعشان هو زعلان كده يا رب انا وهو لا صليت ودعيتله كتير ربنا يفك خنقته ويسند قلبه ويعدى المحنة دى ايا كانت هى اي

خرج من الاوضة وهو لابس هدومه ومن غير كلام ومن غير حاجة خد مفاتيحه اللى لسة راميها على السفرة أما دخل ونزل

جريت مسكت أيده _ مش هتاكل
زق ايدى بعنف وبعدنى عنه وسابنى ونزل
فضلت باصة لطيفه بصدمة عمره ما اتعامل معايا كده طب انا عملت حاجة زعلته !!!

فضلت مستنياه طول الليل ومجاش يا ترى اتاخرت فين يا ريان قلقت قلبى عليك يا ترى فيك اي

ريان .........
كان قاعد فى عربيته على النيل والجو متاخر والدنيا برد وهو ساند راسه على الدريكسيون وبيفكر
انا عارف انى كنت قاسى عليها جدا بس اعمل اي سامحيني يا ريحانة بس انا مش هقدر اواجهك اقولك اي اقولك انك مستحيل تكونى ام وانتى جمبى انا عارف انك هتضحى بسعادتك عشانى بس ده مستحيل اقبل بيه انا مش عايز غير اشوفك مبسوطة ولازم اعمل كده انا اسف

تانى يوم باليل كانت قاعدة بتتصل بيه كتير جدا بقاله يوم مرجعش ازاى يعمل فيا كده هونت عليه يسيبنى قلقانة

رجع من برة وشكله ضعيف وهفتان وعينه حمرة وتعبان يا حبيبى يا ريان

_ كنت فين من امبارح يا ريان
ببرود _ معلش كنت بحضر إجراءات سفرى وإجراءات طلاقنا

_ طيب بس تسيبنى كده من غير ما تطمنى عليك اي قولت اي

_ انتى طالق يا ريحانة
سابنى ودخل الاوضة وانا لسة واقفة بحاول استوعب انى اكيد سمعت غلط مستحيل يكون حقيقة ريان سابنى !! اتخلى عنى !!! هان عليك قلبى طيب !!! طب وحبنا وحياتنا اللى راسمينها هتبعد عنى طب ليه !!!

فضل طول اليوم فى الاوضة وقافل على نفسه خبطت كتير اوى مفتحليش مردش عليا اصلا

_ ريان افتح انت ليه بتعمل كده صوتى ابتدى يتخنق وهعيط انا عملت حاجة زعلتك طيب طيب اخرج كل انت مكالتش حاجة هو انت كده خلاص سيبتنى

قعدت وسندت ضهرى على باب الاوضة خلاص مش قادرة أقف تانى وسيبت دموعى تنزل بحرقة على قلبى اللى اتكسر

ريان ........
كنت جوة سمعت كل حاجة قالتها قلبى بيتقطع عليها وعلى نفسى مبحبش دموعها اتخنقت كانت واقفة ورا الباب وبتسالنى زنبها اي متعرفش أنه زنبى انا وان كل كلمة بتقولها بتقتلنى قبلها قعدت ورا الباب ودموعى بتنزل على حياتنا اللى كنا راسمينها ازاى هقدر ابعد عنها شوية واتماسكت وقومت ومسكت شنطتى اللى حضرتها طول اليوم عشان خلاص طيارتى الفجر

لقيته بيفتح الباب وانا كنت لسة قاعدة خرج وفى أيده شنطته بصيتله بصدمة وهو كان بارد

_ طيارتى الفجر حابب اودعك لأن بينا عشرة تلت سنين بردو مش شوية

_ عشرة !! بس !! هو انت سيبتنى بجد اتخليت عنى !!

دموعها وجعت قلبى اديتها ضهرى وكنت ماشى مسكت ايدى
_ انت بتعمل فيا مقلب صح بس بوخ اوى يا ريان
مجرد ما لمستنى غمضت عنيا من كتر الوجع اللى جوايا اكتر منها بس انا مضطر والله ده عشانها

بعدت أيدها ولفيت بصيتلها ببرود _ انا مسافر هحقق حلمى ومش محتاجك معايا لانى هعيش هناك مش نرجع تانى واكيد هتجوز هناك عشان كده طلقتك عشان تشوفى حياتك بعيد عنى

صدمة ورا صدمة وانا مش مستوعبة خلاص مش قادرة دماغى تدريجى بتبعد عن الواقع واخر حاجة شوفتها وهو بيسحب شنطته وراه وماشى وسايبنى !!!

صحيت لقيت نفسى فى مستشفى لوحدى معييش حد اومال مين جابنى اكيد هو اكيد مهونتش عليه يسيبنى قومت من على السرير وانا مش قادرة بس لازم تشوفه اكيد هو برة اكيد

خرجت وبردو محدش برة قابلت دكتورة تقريبا هى اللى كشفت عليا 
_ اي قومك بس انتى تعبانة
_ هو مين جابنى هنا
_ تقريبا جوز حضرتك بس معرفش هو راح فين الحقيقة
ابتسمت هو مسابنيش معانش عليه يسيبنى طب راح فين

بصدمة _ هى الساعة كام
_ تقريبا 2 ونص

اتصدمت الطيارة معقول هيسافر سيبت الدكتورة وحريته خدت اقرب تاكسى وروحت المطار حتى تعبى مهتمتش بيه

بعد وقت وصلت كان فى صالة المطار شوفته داخل خلاص
_ ريان
بصلى بصدمة ازاى روحتله وجالى
_ جيتى ليه
بدموع _ متسافرش
بحزن _ لازم امشى
_ هتسيبنى
_ مش بايدى
_ هونت عليك
_ عمرك ما تهونى انا اسف يا ريحانة
لف تانى وكان هيمشى مسكت أيده انا م عايزاه يمشى حياتنا اتقلبت بين يوم وليلة انا لسة مش مستوعبة أنه حقيقة اكيد بحلم
_ ريان متمشيش
من غير ما يلف بعد ايدى عنه وانا متبته فيه وسابنى ومشى

يعنى اي يعنى خلاص سافر يعنى طلقنى يعنى سابنى اتخلى عنى خلاص حياتنا انتهت !!!!

روحت شقتى وفضلت مستنياه يجى يوم ويوم ويوم بس مجاش وانا مش قادرة اصدق أنه مشى مستنياه يرجع من شغله عشان نتغدى ونتفرج على الكرتون وياخدنى فى حضنه !!!

عدى اسبوعين
ويوم انا نزلت قعدت على النيل مكان ما كنا بنقعد سوا
وحشنى ! اه وحشنى بس مش هكلمه ولو شوفته هزعل منه خالص بقى وهسيبه كمان هاا

_ ريحانة
حسيت انى اتوهمت صوته بس لفيت لقيته
قومت معرفش ازاى فى ثانية كنت فى حضنه وبعيط
_ انت ازاى تمشى وتسيبنى كده انت ازاى تتخلى عنى انت وحش وانا مش هسامحك خالص على وجع قلبى ده يا ريان لحظة هو انت كده طلقتنى

بعدت عنه وانا مصدمة حرام احضنه!!

شدنى لحضنه تانى _ حقك على قلبى والله انا اسف انا اسف سامحينى يا ريحانتى

بعدت تانى _ حرام تحضنى
_ لا مش حرام انا طاقتك بينا مكانش فى شهود محدش يعرف يعنى انتى لسة مراتى وسالت فيها متقلقيش

_ بردو تبعد عنى عشان مش طايقاك قلبك طاوعك تقولها

_ انتى مش عارفة انا كنت عامل ازاى يومها الدكتور كلمنى لما عملنا التحاليل انا وانتى قبلها وقالى انى مبخلفش كنت عايزك مبسوطة ساعتها افتكرت كل لحظة بتحلمى فيها بطفل وانتى بتختارى أسمائهم وانتى بتحكيلى ازاى هتلاعبيهم وانتى بتحلمى بيهم مكنتش اقدر احرمك من كل الاحلام دى

ضربته فى صدره _ وانت بقى بتقرر من دماغك مخدتش رايي بتسيبنى وتبعد عنى وعايز تطلقنى

دموعى زادت وانا بضربه مسك ايدى وضمنى وانا عيطت اكتر ومسكت فيه

_ حقك عليا والله انا اسف
_ واي اللى رجعك
_مقدرتش افضل بعيد اكتر من كده انا رجعت عشان بس اشوفك من بعيد ولما شوفت حالك مقدرش ابعد نفسى يا ريحانة ارجوكى سامحينى تعالى نبدا من جدي وان شاء الله ربنا يرزقنا
_ مستنى منى اسامحك ليه مقولتش كده من الاول يا ريان
_ مفكرتش فى حاجة غيرك مفكرتش غير فى سعادتك
انا بحبك يا ريحانة
_ للاسف ريحانة كمان بتحبك

بعد سنين كتيييير
_ وخلفتوا يا تيتا
_ اومال ابوك جه منين ومنين انا تيتا بتفكرنى بشبابى والله يا ابنى واخد نفس الذكاء ماشاء الله عليك
ضحك وضحك معاه بقيت احفادى وسمعت صوت ضحكته من ورايا
_ حبيبتى مفيش اذكى منها
جه ابنى من وراه وهو بيصفر وغمز
_ ياسيدى يا سيدى مش قدام الاحفاد كده يا جدو

ريان _ حبيبتى احبها فى كل حتة مالكش دعوة
بعدين بصلى _ بحبك يا ريحانتى
_ وريحانتك بتحبك والله

وفى الخلفية ميادة الحناوي بتغنى انا بعشقك انا انا كلى لك انا ♥️

تمت....♥️

#سلسلة_حواديت_ريحانة_وريان ♥️
#بقلم_فاطمة_سعيد ✍️♥️