♠Tanya's POV♠

"Don't worry ova him mi gal, maybe him neva wen di one fi yo. Don't sorry ova nutten, everything work out fi di best. Who knows, maybe if dis neva happen yo wud a still Inna di dark and poor you wouldn't know seh a suh him did tan" mi glad melia figure him out earlia dan lata dung di line. Mi know him did of no gud tuh har but still mi neva know him wudda diss up melia suh

"Yeah yuh rite. Mi just a go start off fresh from now on, mi a gi man a break now though, mi nu ready fi nuh more man stress, man can wait fi last yah" wen we as female loose off a man wi still have wi future ahead a wi suh wi can't spoil up dat to sake a man stress

"Tru to dat, man a di least, di whole a dem a failure sake a suh mi nah put my full trust Inna none a dem" although me ah Chris deh mi nah lie mi nuh too trust him eno

"Yuh betta nuh mek none a dem fool yuh up like how romario do mi" nutten nuh wrong if me learn from melia mistake, at least mi wi nuh mek di same mistake melia mek wid di maaga bwoy. "All mi a seh is, gal pickney fi know wah dem a do and don't mek nuh man tek dem fi a fool"

"Yuh likkle dan mi but yuh nuh fool Mon, cuh mi gal a gimmi big woman advice. Rayyyy!"  Mi always just extra suh. Melia know seh a so it tan inna wi blood already

"You affi know if yo wah tek mi advice or mek it pass through one ears" wi did deh a di bus stop a wait fi wi bus driver Sicky, him gone pan him first trip already suh wi did a wait pan him second trip. Di aftanoon sun hot ya though, wi school ova midday cause memba seh a di mawning shift wi deh pan.

"Baxide hole!" Mi cuss side a melia wen mi si di bike bwoy a com pan him bike towards wi. Mi nuh know why but mi heart just start beat fast suh.

"A you yuh new man a com fa?" Melia ask mi meanwhile di two a wi a look pan di bike which a mek it way towards wi.

"Which new man dat?" Mi gwan like seh mi nuh know seh a di bike bwoy melia a chat bout, him just speed past wi suh. A wonda a weh him a hurry guh. Di way how him unda him darkaz him not even si mi, mek di dutty bwoy gwan mon, a nah seh nutten.

"Gwan like seh yo nuh know wah mi a chat bout" mi look pan melia side way and cut mi eye while mi kiss mi teeth

"Mi have Chris already, mi nuh wah nobody else. Member seh mi nuh tan like di maaga bwoy eno. Mi a nuh cheater and by di way , a one man to my thing girl" mi an melia tap unda one big mango tree a wait pan wi bus driva fi guh home. Di time hot like wah, not even di breeze from unda di mango tree can cool mi dung right now

" suh yuh seh! Si yuh new man a com yah again" mi nuh know wah do melia, shi nuh tap call dis bike bwoy mi new man, shi nuh si seh mi already taken . Mi look dung di road an si di bike bwoy a com towards mi an melia pon him bike, him have somaddi behind a him dis time pon di bike, wah gal

A must a she him did a speed pass wi fi go pick up. Him speed pass wi again and mi just feel wah piece a hatred rush through mi. Di gal behind a him a one a dem gal deh dat think dem hot ,shi have likkle shape thou. Shi brown but yo can si seh a nuh genuine browning, a wah bleach out face gal weh have in wah piece a long,straight hair wah look like Brazilian knock off. Shi hold on tight round di bike bwoy waist and a push out har bumpa. Di bitch must a don't see seh a don't wah RR bike fi shi a push out har ass. Who can push out ass pon wah piece a damn johncrow bike? Slut cudnt drop off mon

"Somaddi jealous" mi hear melia seh wen shi realize how mi cudnt tek mi eye off a di two fool dem dat just pass

"Jealous ova wah? Dat deh gal deh look fake like. Can bet seh har crotches dun deh now" melia buss out a laugh ah shake har head

"Leave di gal alone, a tru yo mad seh a don't you dat a hold on round yuh new man waist" why deh gal yah nuh shut har mouth Mon. Shi just a hot up mi head.

"A suh mi know seh a pay shit yo talk. Memba seh mi already have.."

"Mi man" melia finish mi sentence before mi cudda finish it  "every time yo say so but dat nuh say , you can still develop feelings fi someone else"

"Which feelings dat? I don't have no feelings fi di bwoy" mi tell melia before shi go nuh further

"Den why yo can't stop lust afta him den?" Lust? Mi deh lust? Hear dis now eeh.

"Lust? Stop yo noise yah suh eno. Mek mi ask yo a question. Yuh know di meaning a lust? Dat bwoy don't worth lusting ova. Him and him dutty bleach out face gal can go to hell" mi not even like him or him gal. Mi start feel miserable now , dem just a hot up mi head suh inna di hot midday sun ya.
**

TO BE CONTINUED